Op 27 Februarie het Hoërskool JF se saal gegons van afwagting, energie en natuurlik –  ongekende talent! Die aand het tradisioneel afgeskop met Sweet Caroline, want wat is ’n JF-geleentheid sonder hierdie geesdriftige lied? Soos altyd is meneer Wilken met ’n tikkie dramatiese flair van die verhoog begelei, en toe het die talent losgebars!

Met Brendan Peyper, Gerhard Steyn en Appel as gaskunstenaars, was die gehoor behoorlik op hol.  Dit was egter ‘n besonderse oomblik toe Brendan Peyper – ‘n oud-JF-leerder en voormalige JF’s Got Talent-wenner – terugkeer na sy wortels en sy splinternuwe treffer KYK vir die gehoor sing. Toe hy tussen die leerders in die saal beweeg, was daar net een woord om die atmosfeer te beskryf: histeries!! Maar dié histerie het nie daar gestop nie … Die JF-leerders was nie tevrede met net een ster op die verhoog nie — hulle wou ’n hele sterreparade hê! Appel en Gerhard Steyn was danksy die aansteeklike gees van die leerders, wat hul name uit volle bors geskree het, ook binne oomblikke op die verhoog en het spontaan bygedra tot die bulderende JF-gees.  Dit was ’n aand van verrassing, vermaak en ongelooflike optredes.

Die tema “Boer soek ’n vrou” is met styl uitgeleef deur JP (onderhoofseun) en die seremoniemeester “oom” Du Preez Stoltz, wat in hul two-tone hemde en vellies vir die perfekte gasheerduo gesorg het.

Van musiekinstrumente en energieke danspassies tot solosang en groepitems – JF se talent het weer gewys hoekom ons skool ’n broeiplek vir sterre is!

En toe kom die groot oomblik: die wenners! Eerste plek: Die band “Geraas” – en ja, hulle naam sê alles! Die broers, Brendon en Jason Nel, saam met Vian Willemse, het met hul kitare en dromme ‘n klankgolf van talent deur die saal gestuur en almal se voete laat jeuk.

Tweede plek (’n gelykopstryd!):

Inge Stoltz en Khanyisile Zwane, wie se stemkrag die gehoor asemloos gelaat het.

Derde plek: Die Makkers, wat met hul super-hip danspassies die verhoog behoorlik laat kraak het.

Elke deelnemer het ‘n stukkie van hul siel op die verhoog gelos, en vir JF is elkeen van die deelnemers reeds ‘n wenner! Hierdie aand het nie net talent gevier nie, maar ook bewys dat groot drome hier begin.

JF’s Got Talent? Ongetwyfeld! Tot volgende jaar – en dalk sien ons dan nog ‘n toekomstige superster op ons eie verhoog!