Op 23 November 2024 was Safari Country die plek waar elke Bloemfonteiner wou wees. Hierdie nuwe winkel het vir baie opwinding onder die inwoners van Bloem gesorg.

Safari se verwagtinge is oortref toe dié openingsdag vier keer groter was as Nelspruit s’n. Bekende gesigte was orals te sien, en skouers is geskuur met rugbyspelers soos Frans Steyn, Ruan Pienaar en Bismarck du Plessis. Brendan Peyper, Arno Jordaan, Juanita du Plessis en Bok van Blerk was ook in die omtrek. Hierdie kunstenaars het in die biertent opgetree terwyl die rugbylegendes ’n paneelbespreking gehad het oor die Wallis-toetswedstryd wat op die grootskerm gespeel is. Die kaartjies vir al die geriewe daardie dag was R100, en daar was geen ingangsfooi na die winkel nie.

Safari beskik oor die enigste 200 m skiettonnel in die Vrystaat en gaan ook betrokke wees by vuurwapenopleiding. Een van die geboue langs hierdie tak gaan omskep word in ‘n “Safari Outdoor Training” sentrum, waar opgeleide personeel verantwoordelik gaan wees vir die opleiding van vuurwapens. Alhoewel die polisie beheer wil behou oor die verkryging van vuurwapenlisensies, gaan Safari steeds behulpsaam wees deur die gebruik van ‘n elektroniese sisteem. Hierdie sisteem gaan veroorsaak dat jy slegs ongeveer 2 weke wag vir jou lisensie in plaas van 6 maande. Die sisteem gaan 6 to 8 maande neem voor dit binne werking tree.

Dieselfde opwindende klerereeks, wat tans by Safari se hoofkantoor in Pretoria beskikbaar is, kan nou ook in Bloemfontein gekry word.

Willem Immelman se idee het gerealiseer toe die heel eerste Safari in 2008 oopgemaak het. Daardie tyd was daar ’n groot behoefte aan vuurwapens. Safari brei geweldig uit met Bloemfontein wat reeds hul sewende tak is. Hulle beoog om in die toekoms nuwe takke oop te maak in Natal en in die Kaap. Die skakelbeampte sê dat die ondersteuning in Bloemfontein ongelooflik is en dat hulle te lank uit hierdie mark gebly het. Daar lê baie opwindende tye voor vir hierdie nuwe winkel, en Bloemfontein wys reeds tonne ondersteuning.

Jim Fouché wens vir Safari alle voorspoed toe met hul nuwe onderneming in die hartjie van die Vrystaat.

(Aangehegte fotos verskaf)