Verbeel jou jy is vir een dag skoolhoof… Wat sou jy doen? Dalk lugverkoelers in elke klaskamer om ons deur die Januarie-oond te kry? Of dalk ’n gratis “vending machine”?

Om 2026 af te skop, het ons in ’n V&A vir die leerders hierdie vraag gevra, en hulle antwoorde was alles van prakties tot ongelooflik kreatief. Maar een ding is seker: JF-leerders het groot drome en ’n nog groter liefde vir hulle skool.

Wat regtig indrukwekkend was, is dat leerders nie net met groot en onrealistiese idees vorendag gekom het nie. Nee—hulle het gedink aan dinge wat hul skoollewe sou verbeter en tot voordeel van die hele skool sou wees.

Die mini-astro het by baie bo-op die lys uitgekom as nommer een prioriteit. Die hoof-astro, wat in 2023 opgeknap is, is pragtig. Maar is een blink astro genoeg vir JF se tonne talent?

Dit lyk soms of die hoof-astro se skedule al vol genoeg is. Om die klein outjie reg te maak, sou dalk net goeie oefentyd vir ons hokkiebokkies gee – dié kinders wat daardie Wesgrow-beker met soveel entoesiasme najaag.

Dit is duidelik dat leerlinge groot idees en kreatiwiteit oor hulle skoolomgewing koester. Van die mini-astro, tot lugverkoelers, en selfs idees wat net dié mense met ’n bietjie flair sou voorstel, wys hoe hulle aan hul skoollewe, én hoe dit verbeter kan word, dink. Al is nie alles moontlik nie, is dit wonderlik om te sien hoe passievol hulle oor hulle skool is. (Maar miskien is daar nou ’n saadjie geplant dat sommige van hierdie idees in die toekoms ’n werklikheid kan word!)